Hər bir millətin tarixi, mədəniyyəti və dövlətçilik ənənələri onun yazılı sənədlərində yaşayır. Bu sənədləri qoruyub gələcək nəsillərə ötürən məkanlar isə arxivlərdir. Sivilizasiyanın və milli kimliyin qoruyucusu olan arxivlərin əhəmiyyətini vurğulamaq məqsədilə hər il 9 İyun dünyada Beynəlxalq Arxivlər Günü kimi qeyd olunur.
Beynəlxalq Arxivlər Günü, UNESKO-nun təşəbbüsü ilə 1948-ci ildə təsis edilmiş Beynəlxalq Arxivlər Şurasının (ICA) yarandığı günə (9 iyun) təsadüf edir.
Bu xüsusi günün qeyd olunmasında əsas məqsəd ictimaiyyətin diqqətini arxivlərin əhəmiyyətinə cəlb etmək, tarixi sənədlərin qorunmasının vacibliyini aşılamaq, arxiv işçilərinin fədakar əməyini qiymətləndirməkdir.
Arxivlər niyə vacibdir ?
Çox vaxt arxivləri sadəcə "köhnə kağızların saxlandığı tozlu rəflər" kimi təsəvvür edənlər yanılırlar. Arxivlər cəmiyyətin və dövlətin onurğa sütunudur, tarixi həqiqətlərin mənbəyidir: keçmişdə baş vermiş hadisələr, imzalanan müqavilələr və mühüm qərarlar arxiv sənədləri sayəsində təhrif olunmadan günümüzə gəlib çatır. Vətəndaşların, təşkilatların və dövlətlərin hüquqi statusunu, mülkiyyət haqlarını sübut edən ən etibarlı sənədlər arxivlərdə qorunur.
Həmçinin bir xalqın mədəni irsi, dili, adət-ənənələri və keçdiyi inkişaf yolu arxiv fondlarında gizlənir.
Bu gün arxiv işi tamamilə yeni bir mərhələyə qədəm qoyub. Müasir texnologiyaların tətbiqi ilə sənədlərin rəqəmsallaşdırılması (elektron arxiv fəaliyyəti) sürətlənib. Bu həm sənədlərin fiziki olaraq aşınmasının qarşısını alır, həm də tədqiqatçıların və vətəndaşların lazımi məlumatlara daha sürətli və asan çıxışını təmin edir.
Ölkəmizdə də arxiv işinin zəngin tarixi və ənənələri var. Azərbaycan Respublikası Milli Arxiv İdarəsi və onun tabeliyindəki dövlət arxivləri xalqımızın əvəzsiz tarixi irsini göz bəbəyi kimi qoruyur. Son illərdə arxivlərin modernləşdirilməsi, xidmətlərin elektronlaşdırılması istiqamətində mühüm addımlar atılır ki, bu da dövlətimizin milli yaddaşımıza verdiyi yüksək dəyərin göstəricisidir.
Bu əlamətdar gündə, bəşəriyyətin sənədli yaddaşını qorumaq kimi məsuliyyətli və şərəfli bir missiyanı yerinə yetirən bütün arxiv işçilərini təbrik edir, onlara fəaliyyətlərində uğurlar arzulayırıq!
Beynəlxalq Arxivlər Gününüz mübarək!
