Mütəxəssislər gündəlik gəzintini orqanizmin həmişə formada qalmasının vacib şərtlərindən biri olaraq qeyd edirlər. Mütəxəssislər gündəlik piyada gəzintinin xüsusilə ürək-damar xəstəliklərinin qarşısının alınmasında mühüm rol oynadığını bildirirlər.
Konsensus.az xəbər verir ki, həkimlər müntəzəm gəzintinin qan dövranını yaxşılaşdırdığını, arterial təzyiqin normallaşmasına kömək etdiyini və ürəyin fəaliyyətini gücləndirdiyini bildirir. Araşdırmalar göstərir ki, gündə 30 dəqiqə orta tempdə yerimək ürək xəstəlikləri riskini əhəmiyyətli dərəcədə azalda bilər.
Mütəxəssislər qeyd edirlər ki, fiziki aktivlik zamanı ürək daha səmərəli işləyir, qan damarlarının elastikliyi artır və orqanizm oksigenlə daha yaxşı təmin olunur. Bu da infarkt və insult kimi ciddi xəstəliklərin yaranma ehtimalını azaldır.
Gəzinti həmçinin artıq çəkinin idarə olunmasına kömək edir. Artıq çəki isə ürək-damar xəstəliklərinin əsas risk faktorlarından biri hesab olunur. Mütəxəssislər insanların gündəlik həyatlarında daha çox hərəkət etmələrinin vacibliyini vurğulayırlar.
Həkimlər bildirirlər ki, gəzinti üçün xüsusi avadanlığa və ya bahalı idman zallarına ehtiyac yoxdur. Parklarda, küçələrdə və ya işə gedib-gələrkən edilən qısa yürüşlər belə sağlamlığa müsbət təsir göstərir.
Ekspertlərin fikrincə, gəzinti yalnız fiziki deyil, psixoloji sağlamlığa da fayda verir. Təmiz havada yerimək stress səviyyəsini azaldır, əhval-ruhiyyəni yaxşılaşdırır və yuxu keyfiyyətini artırır.
Mütəxəssislər hər yaş qrupundan olan insanlara gündəlik həyatın ayrılmaz hissəsi kimi piyada gəzməyi tövsiyə edirlər.
Zərifə Bəşirqızı