Uşaqların Beynəlxalq Müdafiəsi Günündə Azərbaycan Dövlət Akademik Musiqili Teatrının səhnəsində möhtəşəm bir sənət gecəsi baş tutub və dünya ədəbiyyatının incilərindən sayılan fransız yazıçısı Antuan de Sent-Ekzüperinin "Balaca şahzadə" əsəri əsasında hazırlanmış eyniadlı tamaşa tamaşaçılara təqdim olunub.
Konsensus.az xəbər verir ki, Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyeva və Alona Əliyeva da premyeranı izləyənlər sırasında yer alıblar. Həm azyaşlılar, həm də yetkin auditoriya üçün nəzərdə tutulan bu bədii nümunə, əyləncəli süjet xətti ilə bərabər, daşıdığı dərin fəlsəfi mənası və mənəvi mesajları ilə də böyük maraq doğurub.
Olduqca zəngin və peşəkar yaradıcı heyətin əməyi sayəsində ərsəyə gələn səhnə əsərinin quruluşçu rejissoru Xalq artisti Cənnət Səlimova, ssenari müəllifi və səhnələşdirəni yazıçı-publisist İlqar Fəhmi, bəstəkarı Ruslan Ağababayev, rəssamı Məryəm Ələkbərli, xoreoqrafı Rusiyanın əməkdar incəsənət xadimi Sergey Qritsay, baletmeysterləri isə əməkdar artistlər Zakir və Yelena Ağayevlərdir. Tamaşanın bərpaçı rejissoru Sevinc Məmmədova, bərpaçı xoreoqrafı Məhəmməd Abdullayev, rejissor assistenti isə Çimnaz Bağırovadır.
Musiqili teatrın aparıcı truppasının çiyinlərində yüksələn tamaşada obrazları Faiq Mirzəyev (Kral), Əmrah Dadaşov (Pilot), Hüseyn Əlili (Aydın), Rauf Babayev (Kommersant), Ruslan Mürsəlov (Tülkü), Zaur Əliyev (Dərviş), Nuray Məmmədzadə (Qızılgül), Murad Əliyev (Şoumen) və teatrın balet artistləri bənzərsiz ustalıqla canlandırıblar. Gecənin ən təsirli və rəmzi məqamı isə baş rolla bağlı olub; belə ki, səhnənin əsas qəhrəmanı olan "Balaca şahzadə" obrazına 44 günlük Vətən müharibəsində canından keçərək şəhidlik zirvəsinə ucalan qəhrəmanımız Telman Kəlbiyevin istedadlı övladı Elcan Kəlbiyev həyat verib. Qeyd edək ki, tamaşaçılar tərəfindən sürəkli alqışlarla qarşılanan bu uğurlu layihə ilk dəfə 2019-cu ildə Leyla Əliyevanın bilavasitə dəstəyi və təşəbbüsü ilə səhnəyə qoyulub və teatrın repertuarında xüsusi yer tutur.
