Müasir dövrdə təhsil sisteminin qarşısında duran əsas vəzifələrdən biri şagirdlərin yalnız nəzəri biliklərlə deyil, həm də praktik bacarıqlarla təmin olunmasıdır. Təhsil prosesində rəqəmsal texnologiyalardan istifadə, fərdi yanaşmanın gücləndirilməsi və şagirdlərin tənqidi düşünmə bacarıqlarının inkişaf etdirilməsi getdikcə daha çox əhəmiyyət qazanır.
Təhsil eksperti Rizvan Fikrətoğlu hesab edir ki, məktəbdə əsas diqqət şagirdin əzbərlədiyi məlumatların həcminə deyil, əldə etdiyi bilikləri praktikada tətbiq etmək bacarığına yönəlməlidir.
“Bu gün təhsilin keyfiyyətini yalnız dərslikdəki mövzuların mənimsənilməsi ilə ölçmək düzgün deyil. Şagird öyrəndiyi məlumatı təhlil etməyi, müqayisə aparmağı və real həyatda tətbiq etməyi bacarmalıdır. Bunun üçün müəllimin rolu da dəyişir. Müəllim artıq yalnız məlumat ötürən deyil, şagirdin öyrənmə prosesini istiqamətləndirən şəxs olmalıdır”, – deyə ekspert vurğulayır.
R.Fikrətoğlunun fikrincə, rəqəmsallaşma da təhsil prosesinin mühüm istiqamətlərindən biridir. Lakin texnologiyanın tətbiqi məqsəd deyil, təhsilin keyfiyyətini artıran vasitə kimi nəzərdən keçirilməlidir.
Ekspert bildirir ki, məktəblərdə şagirdlərin fərdi xüsusiyyətlərinin nəzərə alınması da vacibdir. Onun sözlərinə görə, bütün şagirdlərdən eyni nəticəni eyni müddətdə gözləmək əvəzinə, onların bacarıq və potensialına uyğun öyrənmə imkanlarının yaradılması daha effektiv nəticə verə bilər.
“Gələcəyin təhsili daha çox fərdiləşdirilmiş, bacarıq yönümlü və praktik xarakter daşımalıdır. Şagirdə sadəcə ‘nəyi bilməlisən?’ sualını deyil, həm də ‘bildiyini harada və necə tətbiq edə bilərsən?’ sualını verməliyik”, – deyə Rizvan Fikrətoğlu qeyd edir.
Təhsil üzrə müzakirələr göstərir ki, məktəblərdə keyfiyyətli nəticə əldə etmək üçün müəllim hazırlığı, tədris metodlarının yenilənməsi, valideyn-məktəb əməkdaşlığı və şagirdlərin fərdi inkişafının dəstəklənməsi paralel şəkildə həyata keçirilməlidir.
Belə yanaşma təhsilin yalnız imtahan nəticələrinə deyil, şagirdlərin gələcək həyata və əmək bazarına hazırlığına da xidmət edə bilər.