Azərbaycanda gənc xanımların sağlamlıq mövzusunda maarifləndirilməsi, cəmiyyətdə erkən profilaktika mədəniyyətinin formalaşdırılması və stereotiplərin aradan qaldırılması məqsədilə mühüm bir sosial təşəbbüs uğurla başa çatıb.
Konsensus.az xəbər verir ki, “Qadınlar və QİÇS: Sağlam Gələcək Naminə” layihəsi çərçivəsində təşkil olunan maarifləndirici təlimlər iyunun 15-i və 16-da gənc xanımlar arasında keçirilən sonuncu görüşlərlə yekunlaşıb. Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi və AIDS-lə Mübarizə İctimai Birliyinin təşkilatçılığı ilə ərsəyə gələn bu layihə gənclər arasında böyük maraqla qarşılanıb. Tədbirin rəsmi açılışını edən layihə rəhbəri Gülnar Nəsibli iştirakçıları salamlayaraq, layihənin qarşıya qoyduğu məqsədlər, görülən işlər və əldə olunan nəticələr barədə geniş məlumat verib. O, çıxışında layihənin əsas hədəfinin gənc qadınlar arasında HİV/QİÇS haqqında məlumatlılıq səviyyəsini artırmaq, sağlam həyat tərzini təşviq etmək və erkən diaqnostikanın əhəmiyyətini aşılamaq olduğunu bildirib. Eyni zamanda AIDS-lə Mübarizə İctimai Birliyinin fəaliyyət istiqamətlərinə toxunan layihə rəhbəri, birliyin həyata keçirdiyi digər sosial və maarifləndirici layihələri də diqqətə çatdırıb.
Layihənin ictimai əhəmiyyətini vurğulayan digər natiqlər də gənclərin bu sahədə aktivliyini yüksək qiymətləndiriblər. Tədbirdə çıxış edən Azərbaycan Respublikasının Prezidenti yanında Dövlət İdarəçilik Akademiyasının müəllimi Murad Həsənxanlı bildirib ki, gənclərin sağlamlıq mövzusunda düzgün və elmi mənbələrə əsaslanan məlumatlar əldə etməsi gələcək nəslin sağlam inkişafı baxımından strateji əhəmiyyət daşıyır. Bu növ təşəbbüslərin davamlı olmasının vacibliyini qeyd edən müəllim, iştirakçılara təhsil və şəxsi inkişaf yollarında uğurlar arzulayıb. Daha sonra təlimin əsas məruzəçisi, Elmi-Tədqiqat Tibbi Profilaktika İnstitutunun həkim-infeksionisti Arzu Pənahova HİV infeksiyasının yaranma səbəbləri, inkişaf mərhələləri, yoluxma yolları və risk qrupları barədə geniş təqdimatla çıxış edib. Həkim iştirakçıların çoxsaylı suallarını cavablandıraraq HİV və QİÇS anlayışları arasındakı fərqləri aydınlaşdırıb, müntəzəm tibbi müayinələrin və müasir müalicə imkanlarının HİV-lə yaşayan insanların normal, keyfiyyətli həyat sürmələrindəki rolunu xüsusi qeyd edib.
Təlimin digər önəmli hissəsi isə xəstəliyin psixoloji və sosial tərəflərinə həsr olunub. Pozitiv Psixologiya Mərkəzinin psixoloqları Elşən İsmayılov və Mədinə Hacılı tərəfindən keçirilən psixoloji dəstək sessiyasında HİV-lə yaşayan şəxslərin qarşılaşdıqları stiqma, ayrı-seçkilik, sosial təcrid və qorxu hisslərinin onların mənəvi vəziyyətinə mənfi təsirlərindən bəhs olunub. Psixoloqlar vurğulayıblar ki, cəmiyyətin düzgün maarifləndirilməsi və insanlar arasında empatiya hissinin artırılması bu şəxslərin yenidən sosial inteqrasiya olunmasına mühüm töhfə verə bilər. İnteraktiv müzakirələr şəraitində keçən bu hissədə iştirakçılar da öz fikirlərini bölüşərək mövzu ətrafında geniş fikir mübadiləsi aparıblar. Tədbirin yekununda iştirakçılar adından çıxış edən Dövlət İdarəçilik Akademiyasının tələbəsi Fatimə Hüseynova layihənin gənclər üçün son dərəcə faydalı olduğunu, qazanılan biliklərin HİV/QİÇS haqqındakı yanlış təsəvvürləri tamamilə aradan qaldırdığını qeyd edərək təşkilatçılara minnətdarlığını bildirib.
Ümumilikdə layihə müddətində müxtəlif yaş qruplarından olan çoxsaylı qadın və gənc xanım üçün maarifləndirici görüşlər keçirilib, onlara HİV/QİÇS-in profilaktikası, sağlam həyat tərzi, psixoloji dəstək və sosial inteqrasiya mövzularında ətraflı məlumatlar çatdırılıb. Cəmiyyətdə sağlamlıq mədəniyyətinin formalaşdırılmasına və ayrı-seçkiliyin azaldılmasına hədəflənən təlimlərin sonunda iştirakçılara xüsusi maarifləndirici materiallar və bukletlər təqdim olunub, sonda isə xatirə şəkilləri çəkdirilib. Əldə olunan yekun nəticələr göstərir ki, bu cür sistemli maarifləndirmə tədbirləri gənclərin sağlam gələcəyə dair məsuliyyətli baxış bucağının formalaşmasında əvəzsiz rol oynayır.
